BAGUIO CITY – Saanen a maituloy ti mapangpanggep a panangiyapela ti La Trinidad, Benguet iti National IATF iti panakaipaisidong ti ili iti Enhanced Community Quarantine (ECQ).
Resulta daytoy ti naangay nga emergency meeting ti Municipal-IATF ken ti lokal a gobierno ti nasao nga ili idi kalman.
Imunna a pinanggep dagiti opisyales ti La Trinidad nga iyapela iti National Inter-agency Task a mabaliwan ti quarantine status dagitoy kagiddan ti saan a kontrolado a panagngato ti kaso ti COVID19 iti masakupan dagitoy.
Iti met panakiyuman ti Bombo Radyo kenni Mayor Romeo Salda, kinunana nga inadalda nga usto ti agbalin a desisyon dagitoy nangruna iti agbalin nga epekto ti ECQ saan laeng nga iti ili ngem ketdi pakairamanan dagiti kabangibang a munisipyo.
Kabayatanna, imbinglay ti mayor nga inadaptarda laengen ti panakaisubli ti market schedule sadiay La Trinidad tapnu malimitaran ti garaw dagiti tattao no sadino agepekto daytoy inton Abril 12 agingga Abril 30.
Nailanad iti schedule a mamindua laeng iti makalawas a mapalubosan a rumwar ken agturong iti merkado publiko ti maysa a miembro tunggal pamilya.
Maiyaplikar latta ti color coding scheme iti tunggal barangay nu sadinno dagiti barangay officials ti mangiwananan iti market schedule iti masakopan dagitoy.
Kagiddan iti daytoy, inyunay-unayna ti baro nga travel restrictions iti BLISTT area a buklen ti Baguio,La Trinidad, Itogon, Sablan,Tuba ken Tublay nga agepekto ita nga aldaw Marso 8 agingga Abril 22.
Impaganetget pay ni Mayor Salda a ti napagnumuan a panagbabliw ti BLISTT travel protocol ken ti market schedule ket pamusposan tapnu malapdan ti ad-adda a transmisyon ti COVID-19.
