BAGUIO CITY – Imbelleng wenno imbasura dagiti sumagmamano a cut flower growers iti probinsia ti Benguet dagiti inapitda a sabong.
Kinuna dagiti cut flower farmers a daytoy ket gaputa saanen a mai-deliver dagiti inapitda sadiay Manila ken impasardeng dagiti buyers ti panangipa-apitda kadagiti angkatenda kuma a sabong.
Intunda daytoy ti kaawan dagiti gumatang iti sabong manipud naiparikep dagiti kamposanto gapu iti agdama a pandemya.
Immuna iti daytoy, naipablaak iti social media ti ladawan dagiti naibelleng a sabong iti deppaar ti Sitio Guitley, Lubas, La Trinidad, Benguet.
Sigun iti nangala kadagiti nasao a ladawan, mismo a ti kaarubada a cut flower grower ti nangibelleng kadagiti nasao a sabong.
Iti met interview ti Bombo Radyo kenni Andy Colte, presidente ti La Trinidad Cutflowers Organic Growers Association, kinunana a saan a mailibak nga adu latta dagiti nalugi a cut flower growers sadiay La Trinidad partikular kadagiti barangay ti Beckel, Bahong, Alno, Shilan, Wangal, Lubas ken Bineng ngem maawatanda daytoy gaputa saan a napadaanan ti agdama a pandemya ken ti panagdalapos dagiti bagyo.
Nupay kasta, mangnamnama latta dagitoy a makasubbotda manipud iti panakalugida iti kanito a mailukat manen dagiti kamposanto inton November 5.
Sigun pay kenkuana, uray dagiti buyers dagiti sabong ket naapektaran iti pandemya.
