BAGUIO CITY – Agal-alan ti Department of the Interior and Local Government (DILG) – Cordillera iti 571 nga agserbi a kanayunan a contact tracers ditoy rehiyon kasaruno ti panakapirma ti Bayanihan to Recover as One Act wenno Bayanihan 2.
Sigun kenni DILG-Cordillera Regional Director Marlo Iringan, makatulong dagiti maala tapnu manayunan ti bilang dagiti immunan a nasanay ken binukel dagiti nagduduma a lokal a gobierno a contact tracing teams.
Kinunana a maiwaras dagiti maala a baro a contact tracers kadagiti nagduduma a lokal a gobyerno iti rehion.
Dinakamatna a makaawat iti binulan a sweldo nga P18,784 dagiti maala a baro a contact tracers ken agpaut ti panagtrabahoda iti gobyerno agingga inton December 31 ti agdama a tawen.
Kwalipikado dagiti indibidual a nagturpos iti bachelor’s degreee nga addaan panaka-ammo iti data gathering, research, panagdukomento, panag-interview ken panagimbestigar.
Karaman kadagiti agbalin a trabaho dagiti baro a contact tracers ti case interviews, profiling, agaramid ti inisyal a public health risk assessment iti COVID-19 cases ken kadagiti nabigbig a close contacts dagitoy.
