![](https://img.bomboradyo.com/baguio/2022/01/SPES-BAGUIO.png)
BAGUIO CITY – Iyaw-awis ti lokal a gobyerno ti Baguio ti panagaplikar dagiti kwalipikado nga estudyante iti Special Program for the Employment of Students wenno SPES para ita a tawen.
Kasaruno daytoy ti panagrugi ti panagparehistro dagiti kwalipikado nga estudyante a mabalin nga agnumar iti SPES.
Puntirya ti SPES a maysa a programa ti gobyerno a matulongan dagiti nakukurapay ngem maikari nga estudyante tapnu malpasda ti panagadalda babaen iti panakaipaay ti empleyo wenno pagtrabahuan dagitoy kabayatan ti bakasyonda iti pagaladan.
Maikalkalikagum ti personal a panagarehistro ken panagaplikar dagiti interesado nga estudyante iti Public Employment Service Office bayat a mailukat ti application/registration dagiti baro nga aplikante iti Doña Josefa Cariño Elementary School inton Febryary 3-5, 2022 iti alas-nuebe ti agsapa agingga alas-kwatro ti malem.
Kwalipikado iti SPES dagiti bonfide residents ti Baguio wenno agarup innem a bulan nga agnanaed iti siudad; physically ken mentally-fit; fully vaccinated ken nasken nga 18-30-anyos sakbay ti April 1, 2022.
Maikalkalikagum metlaeng a ti aplikante ket naka-enroll wenno addaan ti plano nga ag-enroll iti sumaruno nga school term/semester kalpasan ti maudi nga aldaw ti employment period iti SPES; addaan ti average passing grade iti kaudian nga school term; saan nga schoolar ti gobyerno ken saan a benipisaryo ti educational/financial assistance ti Baguio; addaan good moral character ken miembro ti pamilyada iti ‘low income family’ a ti nagtipon a mapaspastrekan ti nagannakda ket saan a sumurok iti nasurok P149,000 iti tinawen.
Maikalkalikagum pay ti panangisumitir dagiti aplikante iti original birth certificate, kaudian a completed grades ken current grades, original wenno certified true copy ti income tax returns wenno certificate of tax exemption ti nagannak, barangay certification iti low income of parents, kaudian nga school ID ken school enrollment/registration form, vaccination card/certificate, maysa a passport size ID picture.