BAGUIO CITY – Inlawlawag ni Loraine Ngao-i, tourism officer ti Department of Tourism-Kalinga, a naawagan a ‘huling mambabatok’ wenno kaudian a mambabatek ni Apo Whang-od manipud iti Tinglayan, Kalinga.
Kinunana a naawagan daytoy a ‘huling mambabatok’ gaputa daytoy laengen ti nabati iti henerasyon daytoy ken daytoy metlaeng ti kaudian a nangbatek kadagiti ‘mangemot’ wenno Kalinga warriors.
Malaksid iti daytoy, kinunana a daytoy metlaeng ti maudi a mambabatek sadiay Barangay Buscalan idi saan pay a nasurwan ti sumagmamano nga umili sadiay nu kasano ti agbatek.
Kabayatanna, naragsakan met daytoy gaputa naguyuguy dagiti agtutubo sadiay a mangadal iti kultura dagitoy.
Impakaamona met nga adda pay ti lima nga apo ni Whang-od a nagadal iti proseso ti tradisyonal a panag-tattoo.
Innayona pay nga adda metlaeng ti duwa a lakay a mambabatek ngem saanda a kayat a daywen dagitoy ti tattao gaputa kayatda a pagtalinaeden a ‘ritwal’ ti panagbatek dagitoy.
