BAGUIO CITY–Naipasardeng ti panagtugaw ni PSSupt. Gerardo Umayao kas OIC-City Director ti Baguio City Police Office (BCPO).
Sigun kenni Ryan Dale Mangusan, secretary ni Mayor Mauricio Domogan, naipadanun kenni Special Assistant to the President, Christopher ‘Bong’ Go ti pakaseknan dagiti opisyales ti siudad iti napasamak a killaat a panakasukat ni PSSupt. Ramil Saculles kas OIC-City Director ti BCPO.
Kinunana a timmawag kenkuana ni Go idi agsapa ken babaen iti kiddawda ket imbilin ni PNP Chief Oscar Albayalde ti panakaisanod ti appointment wenno panakadutok ti OIC-City Director ti BCPO.
Gapu iti daytoy, agserbi kas Acting City Director ti Baguio ni PSSupt. Tirso Dawaten Manoli ti agdama a Deputy City Director for Administration ti BCPO agingga nga adda ti ipatulod ti Kampo Krame a listaan dagiti lima a nominees a mapagpilyan iti agtugaw a regular a City Director ti BCPO.
Maipalagip nga impeksa dagiti opisyales ti siudad ti panakadismaya dagitoy iti killaat a panakaikkat ni Saculles kas dadaulo ti BCPO ken ti arigna panang-bypass ti PNP kadagiti mayor iti panakadutok dagiti chief of police, saan laeng nga iti Baguio ngem iti dadduma a lokal a gobyerno.
Amken dagiti city officials a saan nga ammo ni Umayao ti kasasaad ti linak ken kappia iti siudad ti Baguio.
Inyunay-unay ni Mayor Mauricio Domogan a nasken a ti madutukan a City Director ti Baguio ket ammona ti sitwasyon ken geographical landscape ti siudad.
Dinakamat pay ni Mangusan nga iti baet ti panagapela ti mayor idi kalman ket naipatungpal latta ti turn-over of command iti BCPO.
