BAGUIO CITY – Nainget a kinondenar ti Benguet Provincial Police Office (BPPO) ti panagkikkikil ti dua a pulis a nakadestino iti masakupanda kadagiti collector ken operator ti Small Town Lottery (STL).
Iti panakipatang ti Bombo Radyo-Baguio kenni PSupt. Radino Belly, dadaulo ti Provincial Intelligence Branch (PIB) ti BPPO, kinunana a makapadismaya ti inaramid da SPO3 Paulino Abance Lubos Jr. a nakadestino iti Tublay Municipal Police Station ken SPO4 Gilbert Legaspi nga intel operative ti PIB ti BPPO.
Impanamnamana met ti dagus a panagaksion ti Benguet PPO tapno maimbestigaran ti nasao a banag tapno maisagana ti kaso nga administratibo kontra kadagiti nasao a pulis.
Maipalagip nga inreklamo da Ryan Olsina ken Jerbin Velasco, collector ken operator ti STL sadiay La Trinidad ti maatap a panagkolektar dagiti dua a pulis iti gatad a P5,000 manipud kadakuada kasukat ti saan a panakaipila ti kaso kontra kadakuada.
Nakemmeg met dagiti dua a pulis iti entrapment operation nga insayangkat ti PNP-Counter Intelligence Task Force iti maysa a restaurant sadiay La Trinidad, Benguet a nakakumpiskaran ti P3,000 a marked money.
Sigun iti PNP-CITF, modos dagiti dua nga agtiliw kadagiti collectors ti STL ket kikilanda dagitoy iti P5,000 agingga P40,000 kasukat ti saan a panakaipila ti kaso kontra kadagitoy.
Internal cleansing agtultuloy
Kagiddan iti daytoy, kinuna ni PSupt. Belly nga irtengan pay ti BPPO ti internal cleansing dagitoy.
Kinunana a babaen iti daytoy ket maipanamnama a saanen a mapasarunuan pay ti naireklamo nga aramid da Lubos Jr. ken Legaspi.
Innayonna a nasken a madalusan ti pulisya manipud kadagiti birkug wenno korap a pulis.
Impettengna pay a saan a nagkurang ti liderato ti Benguet PPO iti panangpalagip kadagiti pulis iti panangliklikda iti iligal nga aramid nangruna ta dagitoy ti pannakabagi ti linteg.
Tulong ti publiko
Kabayatanna, al-allukuyenna ti panakikaykaysa dagiti umili iti panakalapped dagiti iligal nga aramid dagiti dadduma a pulis iti probinsia babaen iti dagus a panangireport dagitoy no adda ti ammo wenno maimatanganda nga iligal nga aktibidad dagiti pulis kas iti panagkutong.
Mangnamnama pay ti Benguet PPO nga agtalinaed ti nangato a panagtalek dagiti umili kadakuada.
-by: GloryBalegan
