BAGUIO CITY – Saan a nagbalin lapped kenni bemedalled archer Charmaine Angela Villamor ti kinakurang ti panagsanayna para iti Palarong Pambansa 2017 tapnu makagun-od daytoy iti uppat a gold medals iti archery – secondary division para iti Team Cordillera iti nasao nga ay-ayam.
Kinuna ti Grade 10 student a saan a tuloy-tuloy ti panagsanayna para iti nasao nga ay-ayam ken nangrugi laeng nga agsanay iti umuna a paset ti agdama a bulan ti Abril.
Dinakamatna a kurang ti oras wenno panawen nga inlatangna para iti panagsanayna ngem maragsakan latta daytoy iti nagbalin a resulta dagiti ay-ayamna.
Iti panakiuman ti Bombo Radyo, inaklon ni Villamor a narigatan daytoy iti immuna nga uppat a labanna nangruna iti 30 meters category nga uray pay daytoy ti kaasitgan gaputa ditoy a nakarikna iti panag-nerbiyos.
Kinunana a nagbalin metlaeng a karit kenkuana ti kasasaad ti panawen iti venue ti ay-ayamda nangruna ti angin gaputa maysa daytoy a factor iti panagay-ayam iti archery.
Innayonna nga iti panagtultuloy ti kompetisyon ket nasurona no kasano a sangwen ti buteng a marikriknana ken no kasano nga ikontrol ti emosyonna.
Kiniddawna pay ti agtultuloy a suporta ken kararag para kadagiti atleta ti rehion sadiay Antique.
Ita nga aldaw ket nakasagana manen ti multi-gold medalist para iti nabatbati a tallo a laban ti archery team ti rehiyon Cordillera.
Maipalagip nga iti Palaro 2016 ket maysa metlaeng ni Villamor kadagiti nakai-yawid ti gold medals para iti Team Cordillera.
