Nawayawayaan ni sigud a Negros Oriental Representative Arnolfo “Arnie” Teves Jr. kalpasan iti naipatungpal a “house arrest” sadiay Timor Leste.
Kinumpirmar daytoy ti abogadona a ni Atty. Ferdinand Topacio ita laeng nga aldaw.
Ngem nupay kasta, adda dagiti sumagmamano a kondision a naipataw kenkuana para iti pannakawayawayana.
Karaman ti regular a panagreportna iti court officer ken ti panangikarina a saan nga agtalaw daytoy idiay Timor Leste bayat a manarimaan ti “extradition case” daytoy.
Maipalagip a naipatungpal ti “extradition trial” ni Teves Jr itay laeng nabiit, sigun iti Department of Justice (DOJ).
Ti trial a napasamak idiay Timor-Leste Court of Appeals ket kasaruno ti kiddaw ti gobierno ti Pilipinas a maipasubli ni Teves idi Pilipinas nu sadinno, sumangsango daytoy ti kaso a pammapatay gapu iti maipagarup a pannakairamanna iti pannakapapatay ni Negros Oriental Governor Roel Degamo ken dadduma pay iti pagtaengan ti gobernador idi Marso 4, 2023.
