Inarestar ulit dagiti kameng ti pulisya sadiay East Timor ni sigud a Negros Oriental Representative Arnolfo Teves Jr. sumagmamano laeng a kanito kasaruno ti panakawaya-wayana.
Sigun kenni Department of Justice(DOJ) Assistant Secretary ken spokesperson Jose Dominic Clavano IV, “misleading”, “highly irresponsible”, ken insulto iti Pilipinas ken iti Timor-Leste ti panangikalintegan ti abogado ni Teves Jr. nga “out of time” ken saan a maitunos iti customary ti international law ti kiniddaw ti Pilipinas a panaka-extradite ni Teves Jr.
Inlawlawag ni Clavano a naisubmitir ti Pilipinas amin a kasapulan a banag para iti nasao nga aksyon, ken “fully compliant” daytoy iti pagalagadan ti pagilian a East Timor.
Kagiddan dayta, impasigurado ni Clavano nga agballigi ti extradition proceedings kenni Teves Jr. nu sadino, impeksana ti gagarna a maisubli daytoy iti pagilian tapno sangwenna dagiti nagtutuon a kasona nga adda pakainaiganna iti pammapatay.
