BAGUIO CITY – Inyebkas dagiti local artists ken event organizers iti siudad ti Baguio ti panagdanagda seknan iti advisory iti City Treasury Office (CTO) a mangimanmandato iti permit ken amusement tax para kadagiti maisayangkat a local events.
Maibasar iti advisory, kasapulan ti Mayor’s wenno Special Permit ken addaan iti 10% nga amusement tax para iti special events ken 5% para kadagiti sports activities, malaksid pay iti dadduma nga administrative requirements.
Binabalaw daytoy iti theater director a ni Ferdie Balanag, a mangibagbaga a kanayunan a dagsen dagiti pagalagadan iti babassit nga art productions ken maisupadi iti panggep iti Baguio kas maysa nga UNESCO Creative City.
Kidkiddawen met dagiti artists ken umili a biagen ti singasing nga “Incentivizing Creativity in Baguio City,” a panggepna a mangipaay iti tax incentives, financial assistance, ken nalaka a permit process, ken dadduma pay a suporta iti creative sector.
Insingasingda metlaeng ti nalaklaka a pagalagadan para iti babassit nga events tapno saan a mapaldan ti panagdur-as iti local arts.