Nagkiddaw ti pammakawan ni Marifa Leah Ludaes, ti asawa ti nangipila ti reklamo a ni Mario S. Ludaes, kenni re-elected Congressman Eric Go Yap, ken kadagiti mangsupsuporta kenni Yap.
Iti facebook post ni Mrs. Ludaes, nagpasensia daytoy iti kaso nga impila ti asawana, ken inaklonna a naapektaran ti “peace of mind” ti kaaduan isut gapuna nga agkidkiddawda ti pammakawan.
Impakaamona a ti addang nga inaramid ti asawana ket bukoddna nga aramid ken saanda nga ammo ti intension ti asawana.
Inlawlawagna a saanda a nakipaset wenno sinuportaran ti desision ti asawana a mangipila iti kaso kontra iti baro a nabutosan a Congressman.
Inaklonna a maladangitan metlaeng iti sitwasion ken ti epektona iti komunidad.
Kinunana a napateg kenkuada ti talek ken panagraem nga impaay dagiti umili ti Benguet kadagiti nabutosan nga opisial, ken bigbigbigenda ti kinapateg ti panangmintinir ti talna ken panagkaykaysa iti uneg ti komunidad.
Kidkiddawen ni Mrs. Ludaes ti pannakaawat iti tunggal maysa.
Agpapakaasi pay ni Mrs. Ludaes kadagiti mabalin nga addang nga aramiden ti publiko kontra kadakuada a posible a mangpataud iti “stress” wenno pannakariribuk.
Kinunana a maikarida iti talna ken pulos a saanda nga ummanamong iti nakababain a kababalin.
Dinakamatna pay nga ikonsidera ti tattao ti pamiliada.
