BAGUIO CITY – Boluntaryo a simmuko kadagiti otoridad ti maysa a babai a kameng ti komunista a rebelde iti headquarters ti 50th Infantry Battalion sadiay Barangay Camalog, Pinukpuk, Kalinga.
Nabigbig ti nasao a rebelde a ni Liza Gumabay, alias Raida, agtawen iti 32 ken asawa ti pimmusay a lider ti Kilusang Larangan Guerilla (KLG) Baggas a ni Ruben Gumabay.
Impanamnama ni Lt. Col. Gulliver Siñeres, Commanding Officer ti 50th IB, ti kinatalged ni Gumabay bayat ti pannakaiproseso dagiti benipisio a maipaay kenkuana iti sidong ti Comprehensive Local Integration Program (CLIP) ti gobierno.
Maibasar iti listaan ti 5th IB ti Philippine Army, dumanonen iti 30 a kameng ti komunista a rebelde ti simmuko kadagiti otoridad ken kaaduan kadagitoy ket nagtaud iti Rehion Cordillera.
Kinuna met ni Maj. Gen. Paul Talay Atal a ti panagsuko dagiti rebelde ket kaipapananna nga epektibo ti maisaksakad a kappia iti nagbaetan ti gobierno ken dagiti rebelde.
Inallukoy ni Atal dagiti nabatbati pay kameng ti komunista a grupo a sumukodan iti gobierno ken makikaykaysa dagitoy iti pannakapadur-as ti pagilian.
