BAGUIO CITY – Naduktalan a nagsubli ti presensia ti African Swine Fever (ASF) iti uppat a barangay iti tallo a munisipyo iti probinsya ti Benguet idi laeng napalabas a bulan.
Iti eksklusibo nga interview ti Bombo Radyo Baguio, imbinglay ni Povincial Veterinarian Dr. Miriam Tiongan nga immunan a nakailista dagitoy iti dua a kaso ti ASF idi december 2 ti napalabas a tawen.
Kinunana a naklaat daytoy idi naduktalanda idi March 26 iti agdama a tawen ti kaunaan a kaso ti ASF a nairekord sadiay Tublay ken Tuba a sinaruno dagiti kaso ti ASF sadiay Tuba ken Itogon idi March 31.
Naduktalan iti imbestigasyonda nga adda ti maysa nga umili sadiay Tublay a gimmatang ti baboy iti maysa nga slaughter house iti siudad ti Baguio tapnu partien-na kuma para iti ritwal ngem kalpasan laeng ti dua nga aldaw ket natay ti nasao a baboy ken iti eksaminasyon ket nakitaan iti sintomas ti ASF dagiti dadduma pay a taraken daytoy a baboy.
Sigun kenkuana, dagus a naipasidong iti depopulation wenno panagpatay kadagiti baboy ken disinfection ti pagbaboyan ti nasao nga indibidual tapnu malapdan ti ad-adda a panagwaras ti ASF sadiay Tublay.
Innayonna nga iti kapada nga aldaw, naidanun iti opisinada ti panakatay ti 50 a burias sadiay Tuba, Benguet gapu metlaeng iti ASF.
Naduktalan iti imbestigasyonda nga adda ti maysa nga agtartaraken ti baboy a gimmatang ti burias sadiay Pangasinan ken insang-atna sadiay Tuba a rason iti panagsubli ti ASF sadiay.
Sigun pay kenni Dr. Tiongan, nailista metlaeng ti kaso ti ASF sadiay Itogon kalpasan a nakumpirmar nga ASF ti rason iti panakatay dagiti baboy sadiay.
Kabayatanna, inirtengan ti Benguet Povincial Veterinary Office ti kampanyada kontra iti ASF tapnu maparmeken ti nasao a sakit dagiti baboy manipud iti probinsia.
Dinakamat ti opiysal nga agtultuloy latta ti taripnong nga isaysayangkatda kadagiti munisipyo babaen iti tulong ti Department of Agriculture tapnu maipaka-ammo kadagiti hog raiser dagiti nasken nga aramidenda tapnu saan a makauneg ti ASF iti masakupanda a municipyo.
Innayonna a manarimaan ti panangisayangkatda iti nainget a biosecurity assessment, animal disease surveilance ken information drive kadagiti lugar nga addaan iti pagtaraknan ti baboy.