BAGUIO CITY – Nadismaya ti maysa a 2019 SEA Games gold medalist gapu iti saan a panakaipaay kenkuana ti athlete discount idi gimmatang ti agas iti maysa a drug store a masarakan iti maysa a mall sadiay Session Road, ditoy siudad ti Baguio.
Impeksa ni 2019 SEA Games Obstacle Course Racing gold medalist Sandi Menchi Abahan ti sentimientona babaen iti social media kalpasan a saan nga impaay ti nasao a drug store ti diskwentona kas maibasar iti probisyon ti RA 10699 wenno ti National Athletes and Coaches Benefits and Incentives Act.
Kinunana nga impakitana ti ID-na kas atleta ti pagilian tapnu makanumar iti nasao a diskwento iti ginatangna nga agas a para iti panagpaimbagna.
Nupay kasta, inlanadna iti post-na a nakitana ti panag-ngirsi ti naka-duty a pharmacist ken inyulitna a dinamag ti termino nga ‘athlete’s discount’.
Inawagan ti nasao a pharmacist ti manager-na ngem saanda latta nga inted ti nasao a diskwento.
Innayon ni Abahan nga iti panagkita ti nasao a pharmacist ket nakakatkatawa ti kiddawna.
Impetteng ti atletang a nabigbig kas Asian Circuit Queen a saan laeng a daytoy ti kaunaan a gundaway a daytoy ken dagiti kakadwana nga atleta ket saan a naipaayan iti insentibo ken benipisyo.
“I am posting this for all the times that my co-athletes and I have been denied what we deserve. This was not the first time. I’m tired of people not acknowledging this law. I’m tired of feeling that people think na athletes LANG kami. We may not have studied science or math or english like some of you did. But we have skills and talent that might be, for you useless, pero kami kabuhayan namin yon. At pinaghihirapan. We struggle not just physically, but also mentally and emotionally, when we train. We work hard to bring pride to the country. Kaya wag niyo kaming minamaliit.”
Innayonna a nasken nga adda ti nasaknap a panangipaka-ammo kadagiti amin a negosyo wenno establishimiento iti nasao a linteg para kadagiti national atheltes ken coaches.
Dinakamatna a saan met a dakkel unay ti 20-percent discount para kaditoy a kas nailanad iti RA 10699, pakairamanan ti diskwento no gumatangda iti agas.
Sigun pay iti ultra runner ti Baguio City, nauman daytoy iti saan a panangbigbig dagiti tattao iti nasao a linteg ken nauman daytoy iti arigna panangtagibassit dagiti tattao iti kina-atleta dagitoy.
Impettengna a pagrigrigatanda ti kina-atletada ken ar-aramidenda ti amin a kabaelanda ken panagsanay tapnu maipaayan dayaw ti pagilian nangruna kadagiti international sports competitions.
