BAGUIO CITY – Balligi a naidepensa ni Asian Circuit Queen Sandi Menchi Catlona Abahan ti koronana iti kaleppas a 30th Mt. Kinabalu International Climbathon a naangay sadiay Sabah, Malaysia.
Iti ekslusibo a panakiuman ti Bombo Radyo, kinunana a naileppasna ti nasao a pataray iti las-ud ti tallo nga oras, uppat a minutos ken tallopulo a segundo.
Kinunana a nagun-od met ti Malaysia ti maikadua a pwesto bayat a maikatlo ti manipud Kenya.
Segun kenni Abahan, nariknana ti dakkel a pressure iti nasao a pasalip gaputa adu ti nangnamnama iti panangabakna.
Kinunana a saanna a kayat a maupay dagiti nangnamnama kenkuana isut gapuna nga impakatna ti kabaelanna tapnu mangabak iti 26-kilometer run.
Innayunna a nagbunga met ti awan sarday nga panagensayo ken panagsanay daytoy.
Maipalagip a daytoy ti nagkampeon iti 29th Edition ti Mt. Kinabalu International Climbathon idi napalabas a tawen kalpasan a nakailista iti rekord a 2 hours, 58 minutes and 48 seconds.
Kabayatanna, nagun-od met ni Marcelino Sala-oy manipud iti probinsya ti Benguet ti maikawalo a pwesto iti men’s division iti nasao pay laeng a kompetisyon.
