BAGUIO CITY – Nakailista manen iti pakasaritaan ni Asian Circuit Queen Sandi Menchi Abahan ken uppat pay nga elite trail runners ti pagilian iti 2021 Spartan World Championships a naangay sadiay Abu Dhabi, UAE idi napalabas a lawas.
Iti interview ti Bombo Radyo Baguio, imbinglay ti Igorota elite ultramarathoner a narigat ti nasao a world championships ti obstacle course racing gaputa desyerto ti lokasyonna.
Dinakamatna a dimmalanda iti nainget a beach training camp idi napalabas a bulan tapnu maka-adaptarda iti bara ti panawen nupay na-dengue daytoy, makalawas sakbay ti panagbiaheda sadiay Abu Dhabi a nangapektar iti panagsanayna.
Sigun kenkuana, 21 a kilometro ti tinarayda nga addaan ti 32 nga obstacles kas iti vertical cargo, sandbag carry, barbed wire, stairway to Sparta, extended ring ken full course.
Inleppasna ti pasalip iti uneg ti 3 hours, 32 minutes, 0.03 seconds isut gapuna a nagun-odna ti maika-21 a pwesto manipud kadagiti 56 a babbai a nakipaset iti women’s division ken maika-72 iti overall ranking.
Nupay daytoy ti maikapat a panakipaset ti Baguio-born long-distance runner iti Spartan Race a maysa kadagiti kalatakan nga OCR events iti sangalubongan, daytoy met ti kaunaan a panakipasetna iti world championships ti nasao a pasalip.
Imbingpay metlaeng ti Igorota ultramarathoner ti inanamana nga adda dagiti makaala ti inspirasyon manipud iti panaggaedda.
Impeksana pay ti namnamana nga ipaay ti gobyerno ti umno a tulong ken panangbigbig dagiti atleta ti pagilian, nangruna iti ar-aramidenda para iti pagilian.
Naituding a makipaset ni Abahan iti ultra category ti Spartan Race para iti 50 kilometer run nga addaan ti 60 nga obstacles a maangay inton December 18 ken 19 sadiay Porac, Pampanga.
Maipalagip a gold medalist ni Abahan iti women’s division ti kaunaan nga Altitude Obstacle Course Race World Championships a naangay sadiay Mount Kilimanjaro, Tanzania idi napalabas a Setyembre ti agdama a tawen.
