BAGUIO CITY – Nainget ti panagsagsagana ni Asian Circuit Queen Sandi Menchi Catlona Abahan para iti panakipasetna iti umadani a 2018 Salomon Ring of Steall Skyrace a maysa nga ultra marathon event a maangay sadiay Scotland inton September 15.
Iti panakiyuman ti Bombo Radyo, kinuna ti nalatak a trail runner manipud Baguio City a daytoy ti pinili ti Philippine Sky Running Association a mangibagi iti pagilian iti nasao a pataray gapu kadagiti kwalipikasyonna kas iti namindua a panagkampeonna iti Mt. Kinabalu International Climbathon sadiay Malaysia.
Kinunana a kas maibasar iti impormasyon a naawatna ket narigrigat ti trail ti bantay a makalay-at gaputa pasang-at ken derraas dagiti pagnaan malaksid pay nga iti tuktuk ti bantay ti finish line.
Sigun kenkuana, tumaray daytoy iti 29 kilometers category nga addaan kangatuan nga elevation ken kapeggadan nga slope gaputa adda ti makalay-at ken mataray.
Dinakamatna a nangrugin ti panagsanayna idi June babaen iti panakipaspasetna iti nagduduma nga train runs ken marathons kadagiti kabambantayan.
Imbingay ni Menchi a kangrunaan a tuttutukanna ti upper strength daytoy gapu iti terrain dagiti bantay a makalay-at.
Innayonna a daytoy ti kaunaan a gundaway a makipaset daytoy iti world championship iti sky running sadiay Scotland.
Naituding nga agbiahe daytoy paturong sadiay Scotland inton September 9, kaduana ni trail runner Don Antonio Santillan manipud metlaeng iti siudad ti Baguio a mangibagi iti Pilipinas iti 30 kilometer category ti nasao metlaeng a pataray.
Ti Salomon Ring of Steall Skyrace ti opisyal nga skyrace ti 2018 Skyrunning World Championships.
