Kinumpirmar ni Gina Iniong Araos, Gold Medalist iti 2024 Asian Kickboxing Championship nga awan ti panggepna nga agsubli iti Mixed Martial Arts (MMA) a sigud nga ay-ayamna.
Iti panakiuman ti Bombo Radyo kenkuana, impakaamona a nagretiron daytoy iti panagbalinna kas Professional Mixed Martial Artist kasta met a sinerrekna ti Kickboxing idi tawen 2019.
Kinuna ti Gold Medalist a nakayatanna ti kickboxing rason a daytoy ti intultuloyna a karera.
Nupay kasta, kinunana a saan a nalaka ti nagbalin a journey-na nangruna idi nagbalin daytoy kas maysa nga ina.
Innayonna a ti weight cut ti maysa a karit nu sadino kinasapulanna a bawasan ti kadagsen daytoy idi nagpasngay a dimmanon iti 79 kilos.
Sigun kenni Araos, babaen iti panaganus, training ken disiplina ket nagun-odna ti weight category daytoy a 56 kilos.
Inaklonna a napanunotna ti panagikkatna iti tay-ak ti ay-ayam ngem naguyoguy iti paka-istoryaan ti kapadana metlaeng nga atleta rason a saanna nga intuloy ti plano daytoy nga agikkat.
Iti agdama, adda ni Araos idiay Tagaytay para iti makalawas a bakasyonna sakbay nga ituloyna ti training daytoy.
Maipalagip a ni Araos ket maysa kadagiti atleta a nangibagi iti pagilian iti 2024 Asian Kickboxing Championship iti kategorya a 56kg Lowkick Female division a naangay sadiay Cambodia idi Oktubre sais agingga a trese iti agdama a tawen.
Dagiti nagbalin a kadua ni Araos iti nasao a pasalip ket da Hergie Bacyadan a nakaala iti gold medal iti 70kg K1 Female competition; Carlo Von Buminaang a nakaala iti gold medal iti 67kg Lowkick Male category ken dagiti daduma pay nga atleta.