BAGUIO CITY – Agsanay ditoy siudad ti Baguio dagiti dinosdosena nga atleta ti arnis a makipaset iti 2019 Southeast Asian Games wenno SEA Games a maangay ditoy Pilipinas.
Sigun kenni Philippine Eskrima, Kali and Arnis Association of the Philippines (PEKAP) president ken Senator Juan Miguel Zubiri, innem a bulan a maipasidong iti nainget a panagsanay dagiti nasao nga atleta ditoy siudad.
Kinunana a napa-amanga daytoy iti panang-host ti Baguio City iti kaleppas a Batang Pinoy National Championships isut gapuna nga irekomendarna ti panakaipasidong dagiti nasao nga atleta iti nainget a ‘high altitude training’ ditoy City of Pines.
Impeksana pay ti panakapnekna iti performance dagiti atleta ti arnis ditoy siudad a nangdominar kadagiti kompetisyon ti ay-ayam isut gapuna a posible nga adda dagiti agtaud ditoy kadagiti mangibagi iti Pilipinas iti 2019 SEA Games.
Ur-urayenna ita ti pammalubos ti Philippine Olympic Committee iti nasao a panggepna a panagsanay ditoy siudad dagiti atleta a mangibagi iti pagilian iti 2019 SEA Games nangruna ta adda dagiti sports facilities ditoy Baguio a mabalin a maaramat.
