In-inut a maipakpakaamo ti kabarbaro nga ay-ayam a vovinam iti pagilian.
Iti panakiuman ti Bombo Radyo kenni Bryan Olod, maysa a coach ti vovinam, kinunana a daytoy ket maysa a traditional sport sadiay Vietnam ken mainaig daytoy iti kickboxing a mausar ti flying kicks, fist, ken punches.
Ngem, ti naisangsangayan a technique daytoy ket ti scissor kicks.
Maiparit met ti agusar ti tumeng ken siko iti vovinam.
Sigun kenni Olod, tawen 2019 idi naiyam-ammo ti vovinam iti pagilian kabayatan ti sea games.
Idi napalabas a tawen, daytoy ti kaunaan a gundaway a nakipaset ti pagilian iti 7th World Vovinam Championship sadiay Vietnam no sadino daytoy ket nakipasetan ti kwarentay singko a pagilian.
Kinuna ni Olod nga “history in the making” daytoy gapu ta daytoy ti umuna a gundaway a nagun-od ti pagilian ti gold medal iti nasao nga sport babaen kenni Hergie Bacyadan manipud Kalinga.
Iti agdama, adda ti agarup lima nga atleta manipud Cordillera a paset ti national team ti vovinam.
Kabayatanna, imbinglay ni Olod nga agbalbalin a karit iti nasao nga ay-ayam ti panagadal pay kadagiti kasapulan nga skills nangruna ket kabarbaro daytoy.
Malaksid iti dayta, kasapulan met ti equipments ken ti panag-ensayo dagiti atleta sadiay ballasiw-taaw.
Iti umadanin a laban dagiti atleta sadiay Thailand inton ngudo ti agdama a tawen, kinuna ni Olod nga 80% dagitoyen a nakasagana nangruna ket kanayun ti panag-ensayoda ken adda a makipaspasetda kadagiti nagduduma a training ti combative sports.
Nangipaay met ti nasao a coach ti mensahe kadagiti agpangpanggep a sumrek iti vovinam wenno anyaman a combative sports a kasapulan ti pokus, ti panagregget nga agensayo ken ti panagbalin a motivated no addaan dagitoy ti tarigagay nga agbalin a world champion.
