BAGUIO CITY – Nangrugin ti panagsagana ti Department of Education (DepEd) – Cordillera para iti Palarong Pambansa 2018 a maangay inton April 15 agingga 21 sadiay Vigan, Ilocos Sur.
Sigun kenni Georaloy Palao-ay, information officer ti DepEd-Cordilera, naibilin kadagiti sports coordinators iti tunggal probinsia ken siudad iti rehion ti panangbantay dagitoy kadagiti atletada a makipaset iti Palaro.
Kinunana a nasurok 700 nga atleta ken coaches ken opisyal ti DepEd manipud iti Cordillera ti makipaset iti tinawen nga ay-ayam.
Dinakamatna a manarimaan metten ti panangisagana ti ahensia iti P6-million a pondo nga aramaten ti delegasyon ti rehion iti Palaro malaksid pay iti manamnama a panaka-aprobar ti kanayonan a pondo para iti daytoy.
Sigun met kenni Baguio City Sports coordinator Gaudencio Gonzales, kalpasan ti CARAA Meet ket dagus a nangrugi ti panagsanay dagiti atletada a nakwalipikar iti Palaro nangruna ta kaaduan iti delegasyon ti Cordillera ket agtaud iti siudad.
Naituding nga inton Abril 7 ket agturongen dagiti atleta ti rehion sadiay Vigan ken dagitoy ket agtaud iti mismo a probinsiada sakbayda nga agkikita sadiay.
Impanamnama met ti DepEd-Cordillera a dagiti nagbalin a parikut ken naireklamo iti napalabas a Palaro ket saanen a maulit ita a tawen.
