Pinalagipan ni Palace Press Officer Usec. Claire Castro ni Atty. Manases “Mans” Carpio a saan nga agbuteng no awan met ti iduldulinda.
Daytoy ket kasaruno ti pannakaisubmitir dagiti tax recordsda ken ti asawana a ni Vice President Sara Duterte iti Senate impeachment Court.
Maipalagip a pinatgan ni President Ferdinand “Bongbong’ Marcos Jr. nga isubmitir ti Bureau of Internal Revenue (BIR) dagiti tax records da Duterte kenni Carpio.
Nupay kasta, kinuna ni Carpio a dagiti legal nga isyu seknan iti pammalubos a mairuar ti income tax recordsda ket rumbeng a marisut babaen iti umno a judicial process, uray no agtultuloy ti panangtungpalda kadagiti pammilin ti Senate impeachment court.
Sigun met kenni Palace Press Officer Usec. Castro, karbengan ni Carpio a mangipila iti aniaman nga aksyon ket makita no ania ti pagbanaganna.
Inyunay-unay ni Atty. Castro nga agtungtungpal laeng ti presidente iti linteg ken proseso para iti pananggun-od iti kinapudno.
“Pero tandaan natin, kung wala ka naman nililihim at wala namang makikitang anomalya sa mga records na pinabubuksan, hindi kailangan matakot. Dapat maging proud pa kayo na itong kita ninyo ay galing sa malinis,” sigun kenni Atty. Castro
