Naipaayanen iti uppat a pulo ket lima nga aldaw ti Tourism Division iti Baguio City Administrator’s Office para iti panakairuar iti audit report kadagiti masingsingir kadagiti participating stall owners tunggal adda ti maipatpatungpal nga aktibidad iti Session Road.
Iti panakiuman iti Bombo Radyo kenni Engineer Bonifacio Dela Peña, Administrator iti Baguio City, saan pay a maibaga nu adda a talaga iti napasamak nga anomalya iti panakasingir kadagiti aglaklako iti Session Road gapu ta awan pay ti naidatag wenno naisumitir kenkuana a rekord seknan iti daytoy.
Sigun kenni Engr. Dela Peña,agay-ayam laeng iti P500 agingga P600 ti masingsingir kadagiti non-food related stalls bayat a P700 met ti masingsingir kadagiti agtagikua kadagiti food stalls.
Nupay kasta, adda ti naipadamag itay laeng nabiit seknan iti maatap nga overcharging dagiti organizers iti Sunday Pedestrianization nu sadino, maatap a dumanonen iti P5000 ti singsingiren dagiti sumagmamano kadagitoy.
Gapu iti dayta, nangipatungpal iti lokal a gobyerno iti assessment ken nagnunumwanda ti panakaaramid iti audit report.
Kabayatanna, ti kaadda dagiti organizers ket babaen iti dadaulo iti Tourism Division iti City Administrator’s Office.
Inlawlawag ni Dela Peña a nagdesisyon ti Tourism Division head a mangala iti organizer tunggal maipatungpal ti Sunday Pedestrianization gapu ta adun iti trabaho dagiti kameng iti nasao nga opisina.
Innayonna a saanen a paset iti trabaho ti Tourism Division ti makialam kadagiti aktibidad a maipatpatungpal iti nadakamat a road closure ngem kinunana nga inako dagitoy ti trabaho gapu ta adda metlaeng iti pakainaigan daytoy iti turismo.
Gapu iti dayta,imbinglay ni Engr. Dela Peña nga insingasingnan kadagiti kameng iti Tourism Division a saandan a makibiang iti Sunday Pedestrianization apaman a malpas dagiti naisagana nga aktibidad ita a bulan.//Bombo Rob Dominguez
