Agtultuloy ti panakaipatungpal ti Automated Counting Machine (ACM) roadshow iti siudad ti Baguio para iti panakaipakita ti baro a makina a maaramat iti 2025 National ken Local Elections inton May 12, 2025.
Iti panakiuman ti Bombo Radyo kenni Atty. John Paul Martin, Election Officer iti Commission on Elections (COMELEC)-Baguio, inaklonna nga iti panagtultuloy ti Automated Counting Machine (ACM) roadshow ket sumagmamano pay laeng a barangay ti nangipakita iti interesda para iti nasao a roadshow.
Gapu iti dayta,al-allukoyen ti election officer nga agpaskediul dagiti babbarangay a saan pay a nakaipatungpalan ti Automated Counting Machine (ACM) roadshow tapno maipakaamo ti panagaramat ken features ti baro a makina kadakuada.
Imbinglay ni Atty. Martin nga ita nga aldaw ket maisayangkat ti roadshow dagitoy sadiay San Lorenzo Ruiz Parish ken inimbitaran dagitoy ti maysa a partylist para iti demonstrasyon.
Naituding met inton bigat nga agturong dagitoy iti Lions Club kasta met a maipatungpalen ti kick-off iti election period.
Inton January 13,iti met Department of Education iti siudad ti pakaipakitaan iti demo.
Inton January 14, maipatungpal ti demonstration ken written examination kadagiti agbalin a Department of Education Supervisor Official (DESO) tecnical support staff tapno ammoda nga aramaten ken i-trouble shoot dagiti baro a makina.
Inton January 16, agturong ti Commission on Elections-Baguio iti Saint Luis University Library, iti American Corner ken iti San Vicente.
Para met inton January 18,agturong dagitoy sadiay Pacdal; January 25 sadiay Kayang Extension ken iti Baguio Cathedral bayat nga inton Enero baente syete agingga trenta’y uno ket adda dagitoy iti kalatakan a mall para iti roadshow.
Kabayatanna,maisubli dagiti makina iti main office iti nasao nga ahensya iti ngudo ti agdama a bulan.//Bombo Mera Pacpacan
