BAGUIO CITY – Nakemmeg ti maysa a babae gapu iti kaso a robbery babaen iti extortion kalpasan a naisayangkat ti entrapment operation kontra kenkuana.
Nabigbig daytoy a ni Gavita Adawi, 31-anyos, naasawaan, agtagibalay ken residente ti Atok Trail, Baguio City.
Maibasar iti report, nakaawat iti text messages ti biktima a ni Monalissa Bao-et, 28-anyos, naasawaan, negosyante ken residente ti Atok Trail, Baguio City.
Nagtaud dagiti nasao a text messages iti saanna nga am-ammo a numbero ken agkidkiddaw ti texter iti P500,000 tapnu saan a mapapatay ti maysa a kapamilyada, partikular ti anakda nga agad-adal iti day care.
Dagus a nagkiddaw ti biktima ken ti asawana iti tulong ti pulisya gapu iti amak ken buteng dagitoy.
Naaddaan met iti serye ti negosasyon dagiti biktima ken ti suspek agingga a napagnumuanda a P400,000 ti ipaay ti agasawa ken ti pagsarakanda ket sadiay Firstgate, Loakan Road, Baguio City.
Insayangkat dagiti pulis ti entrapment operation iti nasao a lugar a nagresulta iti panakakemmeg ti suspek.
Naklaat laengen ti agasawa a biktima gaputa ti suspek ket ipag ti asawa a babae ken inaklon ti suspek ti krimen gapu iti parikut iti kwarta.
