Baguio City- Sinentensian iti Regional Trial Court iti siudad ti Baguio ti maysa a babai iti pannakaibalud kalpasan a naduklatan a nakabasol iti uppat a kaso ti estafa nga aggatad iti dandani P82 milion.
Iti desision a nairuar idi Enero 27, nangipaulog ti korte iti sabali a sentensia ken ni Catherine Aquino Belleza iti tunggal kaso ken imbilinna pay a bayadanna dagiti uppat a biktima iti pakabuklan a P81.9 milion, agraman ti 6 a porsiento ti tinawen nga interes agingga a naan-anay a mabayadan ti gatad.
Iti umuna a kaso, nasentensiaan daytoy iti walo a tawen ken maysa nga aldaw agingga iti 15 a tawen ken imbilinna a bayadanna iti P19.2 milyon.
Iti maikadua a kaso, nasentensiaan daytoy iti 10 agingga 20 a tawen a pannakaibalud ken bayadanna iti P41.7 milyon.
Iti maikatlo a kaso ket nasentensiaan daytoy iti 4 a tawen ken dua a bulan agingga 10-11 a tawen ken imbilin iti korte a bayadan ti suspek ti biktima iti P11.5 milyon.
Iti maikapat a kaso, kapada a desision ti naipataw ken pagbaybayadenda iti P9.5 milion iti agassawa a complainants.
Sigun iti korte, agar-aramat ni Belleza iti peke nga ID ken panangallilaw a wagas tapno maala ti dakkel a gatad iti kuarta manipod kadagiti biktima.
Innayon pay iti korte, nalawag nga inaramat iti akusado ti panangallilaw sakbay ken bayat a maisaysayangkat iti krimen tapno maguyugoy dagiti biktima iti transaksion a napaneknekan a peke.
