BAGUIO CITY – Natiliw ti maibilbilang a Regional Top Priority Target dagiti otoridad iti iligal a droga iti buy-bust operation a naisayangkat sadiay Campo Filipino, Baguio City idi kalman.
Nabigbig daytoy a ni Mary Grace Aviles Limjap, 46-anyos, balasang, awanan trabaho ken residente ti City Camp Proper, Baguio City.
Nakumpiskar kenkuana ti tallo a pakete ti maatap a shabu nga agdagsen ti 7 grams ken ti naaramat a buy-bust money.
Iti agdama, sumangsango daytoy iti kaso a kanaglabsing iti RA 9165 wenno ti Comprehensive Dangerous Drugs Act of 2002.
Naamuan a sigud a call center agent ni Limjap ngem pimmanaw iti nasao a trabaho ken maatap a nagbalin a full-time drug poseur.
Naamuan pay iti PDEA nga addan ti immuna a kaso ni Limjap seknan iti iligal a droga ken child abuse.
Maatap a ni Limjap ti drug dealer kadagiti call center agents, kadagiti agtutubo ken kadagiti taxi ken jeepney drivers.
