Napilaan ti kaso ti maysa a babai nga agtawen ti dua pulo ket pito, single, maysa a kahera idiay Puguis, La Trinidad, Benguet, tubo sadiay Bontoc, Mt. Province ken residente ti Riverside, Guisad, Central, Baguio City kalpasan a maatap a tinakawna ti kuarta iti pagtatrabahuanna.
Maibasar ti imbestigasyon ti pulisya, ti suspek ket tinangdanan ti biktima nga agtawen ti uppat a pulo ket siam, naasawaan, maysa a businessman, tubo ti San Miguel, Bulacan ken agdama residente ti Camp Kamiko.
Idi bulan ti Abril, sakbay a nagbakasyon ti biktima iti ballasiw-taaw, intalekna ti pannakaimanehar ti negosyo daytoy.
Malaksid iti dayta, intalekna pay ti 90,000.00 a gatad para iti mabayadan iti construction ken nangibati pay dytoy ti kanayubnan a P80,000.00 iti storage room kas contingency funds.
Sakbay a nagsubli manipod iti bakasyon iti ballasiw-taaw ti biktima idi bulan ti Hulyo, kiniddaw ti suspek a maiyakar ti day-off-na gaputa tumabuno iti graduation ti kabagianna.
Nupay kasta, saanen a nagsubsubli ti suspek.
Kabayatanna, ti met biktima a nagawid idi kapada a bulan ket naduktalanna a saan a simrek ti mapapati a suspek.
Inurayna pay ti mapapati a suspek ken inawaganna daytoy ngem saan a nagparikna.
Idi sinukimat ti biktima ti nangidulinanna kadagiti kuarta ket nadiskobrena a mapukpukaw ti kuarta a naglakuan dagitoy a dumanon iti P85,000, ken mapukpukaw ti nabati a construction funds a dumanon ti 41,714.00 ken ti contingency cash a 80,000.00.
Gapu iti dayta, P257,385 ti pakabuklan a natakaw manipod iti biktima.
Napilaanen ti suspek iti alleged qualified theft.//Bombo Noveh Organo
