BAGUIO CITY – Immapela ti maysa a babai kadagiti jeepney drivers a sursuroenda ti agpakumbaba uray pay nu ti pasahero ti nagbiddut iti maysa a banag.
Kasaruno pay laeng ti panangibabain kenkuana ti maysa a jeepney driver ti Calcalan-Pinsao route kalpasan a nalipatanna nga inted ti plete daytoy.
Segun iti nasao a babai a nagkamang iti Bombo Radyo, naglugan daytoy iti nasao a jeep paturong iti merkado ti siudad ti Baguio ngem nalipatanna ti nagbayad iti plete gaputa adda ti katkatongtongna iti mobile phone daytoy.
Kinunana nga apaman a dimsaag daytoy iti jeep ket pinnukawan daytoy ti driver ken imparupa daytoy ti saanna a panagbayad iti plete.
Nupay napabainan ket nagkiddaw iti pammakawan ti babai ken intedna ti pletena ngem kabayatan ti panagbabana ket pinagsasawan latta daytoy ti driver.
Ditoy nga inasitgan ti babai ti jeepney driver ken indiayana a dobleinna ti pletena ngem saan daytoy nga inawat ti driver.
Gapu iti daytoy ket immapela ti nasao a babai a nu adda man ti nagbiddutanna ket saan daytoy a rumbeng a bugkawan ti driver ken ibagana iti nasayaat ti nagbiddutan ti nasao a pasahero.
