BAGUIO CITY – Nakemmeg ti maysa a babai gapu iti kaso nga estafa kalpasan nga inallilawna ti maysa nga estudyante ditoy siudad ti Baguio.
Nabigbig ti suspek a ni Virginia Aranaiz Abacano, 31-anyos ken tubo ti Mariveles, Bataan.
Nabigbig met ti biktima a ni Daniel Bud-oy, 22-anyos ken residente ti Asin Road, Baguio City.
Maibasar iti blotter ti pulisya, agsapsapol ti biktima iti gaming console babaen iti internet idi nakitana ti maysa gaming console nga aggatad ti P8,500.
Naguyugoy ti biktima a manggatang iti nasao a kagawaan.
Impatulod met ti suspek ti numero ti bank account daytoy ken ti ladawan ti TIN ID-na ken dagus nga impatulod ti biktima ti P8,500 a bayadna.
Nupay kasta, idi kiniddaw ti biktima ti tracking number ti order-na ket saannan a matawagan ti suspek.
Nagpatulong daytoy iti pulisya a nagresulta iti panakakemmeg ti suspek iti naisayangkat nga operasyon.
