BAGUIO CITY – Sumangsango iti panaglabsing iti RA 4136 wenno Anti-Colorum Operation ti maysa nga indibidual kalpasan a natilwan nagbiyahe babaen iti colorum a van idi rabii kalman.
Nakemmeg ni Irene Mariano Minor, 42-anyos, tubo ti Camiling, Tarlac
babaen iti nagtipon a pwersa ti Baguio City Police Office-Traffic Enforcement Unit (BCPO-TEU) ken ti Land Transportation Office-Cordillera (LTO-CAR).
Sigun kadagiti otoridad, natiliw ti suspek ken nakumpiskar ti colorum a Toyota Innova daytoy sadiay Palispis-Aspiras Highway agarop alas-otso idi rabii kalman.
Naamuan a natatakan iti Philippine Economic Zone Authority (PEZA) ti windshield ti lugan nga inmaneho ti suspek a nangipakita iti panagbiyahena kas “Authorized Persons Outside Residence” (APOR).
Nupay kasta, naduktalan iti operasyon dagiti otoridad nga agitulod ni Minor kadagiti pasaheros sadiay Pangasinan.
Napaay pay daytoy a mangipakita iti valid a driver’s license ken ti sertipikasyon a mabalin nga agoperate kas public convenience (CPC).
Adda itan kustodiya ti LTO-Pacdal ti lugan ti suspek.
Kabayatana, naduktalan iti imbestigasyon nga agop-operate ni Minor ken ti managan Clifford John Carambas iti “van-for-rent” services babaen iti social media a mangal-allukoy iti publiko kadagiti local travels iti uneg ken ruar ti siudad ti Baguio.
Maipalagip nga impetteng ng LTO-CAR Director Francis Almora a mamulta iti agingga iti P200,000 dagiti matilwan a mangisaysayangkat iti illegal provincial travel operations kas nailanad iti Joint Administrative Order 2014-001 ti ahensia.
Sigun met kenni Pol Maj Oliver Panabang, dadaulo ti Traffic Enforcement Unit ti BCPO, posible a nabayagen a negosyo ti grupo ni Minor ti mangallukoy iti publiko a mangarkila kadakuada babaen iti social media.
