BAGUIO CITY – Boluntaryo a rakraken dagiti residente ti Barangay MRR Queen of Peace ti bukodda a babbalay ken dadduma a pasdek a saksakupen ti demolition order nga impaulog iti lokal gobierno ti Baguio City.
Iti interview ti Bombo Radyo kenni MRR Queen of Peace Barangay Kagawad Catherine Quinones, kinunana a 52 nga establishimiento ken agarup 22 a pamilya iti maapektaran ti nasao a demolision iti masakupanda a barangay.
Nupay malidayan dagiti apektado a residente, imbingayna a boluntaryon a rakrakenda dagiti pasdek dagitoy sakbay pay ti naituding a panakarakrak dagitoy inton Pebrero 27.
Inlawlawagna a gundawayanda pay ti sumagmamano nga aldaw a nabatbati tapnu agnegosyo sakbay ti naituding a panakarakrak dagitoy.
Sigun pay kenni Kag. Quinones, kangrunaan kadagiti maapektaran dagiti nakukurapay a pamilya ken dadduma a pamilya nga awan ti pag-akaranda iti kanito a marakrak ti babbalayda.