BAGUIO CITY – Natalgeden ti ti baby wenno maladaga nga inispal dagiti pulis sadiay Alfonso Lista, Ifugao kalpasan nga intaray ken imbati daytoy ti mismo nga amana iti kabakiran ti Barangay Sta. Maria idi rabii.
Segun kenni PO2 Joseph Ginichon ti Alfonso Lista Police Station, nakaawatda iti tawag idi alas otso ti rabii maipanggep iti inaramid ti suspek a ni Rosito Balut iti anakna nga agtawen iti maysa ken tallo a bulan.
Kinunana nga intaray ti suspek ti anakda iti live-in partner daytoy kalpasan a nagapada gapu iti nakaro a panagim-imon wenno panagselselos ti suspek.
Kinuna ni Ginichon nga imbati ti suspek ti anakna iti ayan ti bulldozer iti nasamek a paset ti kabakiran.
Gaputa nasipnget ket saanda a dagus a nasarakan ti maladaga agingga a nangegda ti sangit daytoy ken nakitada nga agkarkaradap ken nakaadayo iti sangapulo a metro paturong iti ayan ti kasabsabaan.
Saan met a nakemmeg ti suspek a nakaimet iti pana gaputa nakalibas daytoy.
Inturong dagiti pulis ti maladaga iti ospital ken natalgeden ti kasasaadna iti agdama.
Kinuna met ti ina ti maladaga nga isinanan ti suspek gaputa kanayun daytoy nga agim-imon uray nu dagiti kakasinsinna a lallaki ti katkatongtongna laeng.
