BAGUIO CITY – Parikot latta ti Baguio General Hospital and Medical Center (BGHMC) dagiti backlog kadagiti Specimens a maipaspasidong iti testing.
Sigun ken ni Mayor Benjamin Magalong, daytoy ket gapu iti parikot iti kinakurang ti suplay ti PCR testing kits nangruna ta maiturturong sadiay BGHMC dagiti samples manipud Cordillera, Region 1 ken Region 2.
Kinunana a dumanon iti 2,000 a specimens iti naurnong a backlog iti BGHMC.
Namnamaen ti mayor a saanen a manayonan dagiti backlog ti pagagasan gapu ta posible a mailukat dagiti molecular laboratories sadiay Region 1 ken 2 kadagiti masungad nga aldaw.
Sigun iti mayor, no mailukat dagiti pasilidad iti sabali a rehion ket dagiti laeng samples manipud Cordillera ti iproseso ti BGHMC.
Immunan a kinuna ni Dr. Rowena Galpo, City Health Services Officer ti siudad nga adda ti uppat a PCR machine iti BGHMC ngem dua laeng kadagitoy ti agan-andar.
