BAGUIO CITY – Natalgeden ti kasasaad dagiti dua kadagiti tallo nga indibidwal a nadangran kalpasan a natnag ti naglugananda nga SUV iti rangkis nga addaan kauneg a 150-meters idiay Sitio Begis, Barangay Poblacion, Tuba, Benguet idi parbangon ti Abril 20, iti agdama a tawen.
Iti interview ti Bombo Radyo kenni PCapt. Francis Pawe, Investigation Section Officer ti Tuba Municipal Police Station, niliklikan ti driver ti nasao a lugan ti maysa pay a lugan iti kurbada a paset ti Palispis-Aspiras highway a nangitunda iti panakadungparna iti signage ken panakapukaw ti kontrol daytoy rason a natnag iti mapatta-patta a 150-metro ti kangatona a rangkis.
Sigun pay kenni PCapt. Pawe, agtaltalinaed iti ospital ti maysa pay nga indibidual para iti medical operation gapu iti panakadunor ti luppo daytoy.
Innayona pay nga ipangpangruna ti kapamilya dagiti pimmusay a biktima ti panakaiyawid ti bagi dagitoy sadiay Sitio Balete, Brgy. Sampaloc 2, Sariaya, Quezon Province.
Maipalagip a naideklara a dead on the spot dagiti dua nga indibidual nu sadino nabigbig dagitoy a da Jasper Marcuap, Rodolfo Marcuap bayat nga indekalara met ti attending physician iti Baguio General Hospital and Medical Center (BGHMC) a dead on arrival ti 10-anyos nga ubing.
Dagitoy ket agkakabagian a paturong ditoy siudad ti Baguio manipud pronbinsiya ti Quezon.//Bombo Rob Dominguez
