ITOGON, BENGUET – Pinaghahanap ngayon ng mga awtoridad at mga volunteer ang katawan ng isang senior citizen na nalunod sa spillway ng Binga Dam sa Tinongdan, Itogon, Benguet.
Kinilala ang biktima bilang si Bonifacio Rivera, isang residente ng nasabing lugar.
Ayon kay Cyril Batcagan, head ng Municipal Disaster Risk Reduction and Management Office (MDRRMO) ng Itogon, nangyari ang insidente kahapon, Disyembre 26.
Sa panayam ng Bombo Radyo, sinabi ni Batcagan na ang biktima ay namimingwit nang mangyari ang aksidente.
Posibleng hindi niya narinig ang siren o ang babala mula sa taas na magpapakawala ng tubig mula sa Binga Dam.
Dahil dito, tinangay ng malakas na agos ng tubig si Rivera habang nakatakbo ang isa pa niyang kasama.
Sa kasalukuyan, nagsasagawa ng mga ritwal ang mga residente ng Itogon na pinaniniwalaang makakatulong sa agarang paghahanap ng katawan ng biktima.
