BAGUIO CITY – Nakagun-od iti 29 gold medals, 23 silver medals ken 30 bronze medals dagiti atleta a babbae nga impatulod ti siudad ti Baguio para iti 4th Women’s Martial Arts Festival, maysa nga all-female national competition sadiay Harrison Plaza, Pasay City idi napalabas a lawas.
Sigun kenni City Sports Coordinator Gaudencio Gonzales, kaaduan a balitok a medalya ket nagtaud iti ay-ayam a taekwondo.
Kinunana a karaman kadagiti ay-ayam a nakipasetan dagiti atleta ti siudad ket ti penchak-silat, taekwondo, single-weapon sword dagger, wushu, karatedo ken judu.
Maipalagip a 158 a babbai nga atleta ti impatulod ti siudad para iti nasao a pestibidad ken dagitoy ket nagtaud kadagiti pagaladan ti sekondarya ken kolehio iti siudad ti Baguio.
Tinawen a paspasetan dagiti martial arts athlete ti siudad ti nasao a kompetisyon para metlaeng iti panakapasayaat pay ti talento dagitoy.-
