“All is well,” kasta ti panangiladawan ni Baguio City Mayor Benjamin Magalong iti agdama a kasasaad iti Baguio City kasaruno iti panagdalapos ni Bagyong Kristine.
Iti panakiuman ti Bombo Radyo kenni Mayor Magalong,imbinglayna nga awan ti naibakwit a residente iti siudad ken awan ti nailista a serious damage iti aglawlaw.
Nupay kasta, adda dagiti sumagmamano laeng nga insidente iti panagreggaay iti daga ken panakatuled dagiti kaykayo nga nirespodean metten ti kameng dagiti maseknan nga opisina.
Sigun iti mayor, nasdaawda iti nagbalin nga epekto ni Bagyong Kristine iti Baguio City gapu ta ninamnamada a maysa ti siudad kadagiti nakaro a maapektaran.
Gapu iti dayta, agyamyaman daytoy iti saan unay nakaro nga epekto ti bagyo iti siudad.
Kagiddan dayta, kinomendaran ti local chief executive ti kooperasyon dagiti babbarangay iti panagregget dagitoy tapno masigurado ti kinatalged dagiti residente kadagiti masakupanda.
Kasta met a pinagyamananna dagiti daduma pay a community leaders ken dagiti boluntaryo a timmulong iti panagmonitor iti aglawlaw.//Bombo Rob Dominguez
