Nagrugi ita nga aldaw ti impeachment hearing ni Vice President Sara Duterte iti House of Representatives Justice Committee tapnu maamuan nu umdas dagiti ebidensya kadagiti allegasyon nu adda ti maaw-awagan a probable cause tapnu matuloy ti impeachment case.
Dimmar-ay ni Ramil Madriaga kas kangrunaan a witness a mapapati a sigud a bagman ni VP Sara Duterte idi panawen ti eleksyon a posible a makaipaay ti napapateg a testimonya a makatulong kadagiti allegasyon.
Sigun met kenni Baguio City Congressman Mauricio Domogon, nasken a maituloy ti impeachment case wenno panagdenggeg ni Vice President Sara apaman nga adda ti krisis a sangsangwen ti pagilyan tapnu saan a makompromiso ti akem ti House of Representatives iti trabahoda nga iggaman ti kapada a kaso.
Sigun kenni Congressman Domogan, kabaelan met ti House of Representatives nga aksyonan dagiti nadumaduma-duma a pakaseknan ken saan a lapped nu maituloy ti impeachment case.
Innayonna pay a naipasada met ti gakat a maaddaan ti emergency power ni President Ferdinand Marcos Jr. nga ikkaten ti excise tax ken ti dagus a panangiparwar ti budget para ti ayuda kadagi apektado a sektor tapnu ma-minimize ti impact ti krisis.
Iyunay-unayna a ti panangituloy ti impeachment hearing ni Vice President Sara ken maysa a constitutional mandate wenno constitutional duty ti Congress nga iproseso daytoy a dagus tapnu saan a gross negligence para kadakuada. | via Bombo Jerwin Aquino
