BAGUIO CITY – Nabigbig ti lokal a gobyerno ti Baguio City kas first runner-up iti Search for the Most Child-Friendly City iti entero a Pilipinas ita a tawen.
Sigun kenni City Social Welfare And Development Officer Betty Fangasan, ti nangabak iti pasalip ket ti Davao City bayat a second runner-up ti Mandaluyong City.
Gapu iti daytoy, impanamnamana nga aramidenda ti amin tapnu magun-od ti siudad ti kampeonato iti sumaruno a tawen nangruna ta nagbalin metten a hall of famer ti siudad ti Davao ita a tawen.
Inaklonna nga adu pay dagiti nasken nga isimpa ti lokal a gobyerno ti Baguio City kas iti kaadda ti child participation, panakapapintas ti edukasyon, panagsanay ken seminar para iti pagasayaatan dagiti ubbing ken dadduma pay.
Innayonna a kasapulan met a mapasayaat pay ti implementasyon dagiti child-friendly programs a mangital-o iti developement ken pagsayaatan dagiti ubbing iti lokalidad ken nasken pay a mapatibker ti progarama ti barangay para iti panakasalwad dagiti karbengan dagiti ubbing.
