Umap-apela ti Baguio City General Services Office iti publiko iti siudad ti Baguio seknan iti umno a panagsegrate kadagiti basura.
Iti interview ti Bombo Radyo kenni Engineer Eugene Buyucan, dadaulo ti General Services Office, kinunana a kasapulan nga ammo koma dagiti indibidual ti panag-compose iti food waste iti pagtaengan ken ti saan a panangilaok kadagiti residual waste iti dadduma a basura.
Sigun kenkuana, nu mabalin ket dagitoy ti mangisegregate kadagiti recyclable materials a mabalinda metlaeng a mailako.
Kabayatanna, kidkiddawen ni Buyucan ti tulong dagiti barangay officials a mangidanon iti impormasion seknan iti basura tapno umannugutda iti pagalagadan.
Bigbigenna a maysa ti basura kadagiti kangrunaan a parikut iti siudad isut gapuna a nu saan a maimanehar a nasayaat ket posible nga agbalin a dakdakkel a parikut iti masakbayan a kas ti dadduma a siudad.
