Idagdagadag iti city government iti publiko ti panagtalinaed nga alerto gapu ta saturated dagiti bambantay gapu iti agtultuloy a panagtudo ket nangitunda daytoyen iti 234 nga insidente pakairamanan iti panagregaay iti daga ken pannakatumba dagiti kayo.
Imbalakad ni Aileen Refuerzo, dadaulo ti Baguio City Public Information Office, nga imonitor dagiti residente ti aglawlawada ken dagus nga ireport dagiti unusual signs wenno hazards asideg dagiti babbalayda.
Innayonna pay a mabalin nga itawag dagiti residente dagiti hazards iti 911 ken impasiguradona a dagus nga agresponde ti City Disaster Risk Reduction and Management Office.
Maibasar iti rekord, dumanonen iti walo a babbalay ti totally damage ken 51 ti partially damage.
Maipalagip a nakairekord iti nasurok 2,000 mm a rainfall ti Baguio ken Benguet manipud Agosto 1 agingga 31, triple ti kinaadona no idilig iti average rainfall sigun iti Philippine Atmospheric, Geophysical and Astronomical Services Administration.
Kabayatanna, sigun kenni Larry Esperanza, dadaulo iti PAGASA-Baguio synoptic station, agtultuloy a makapasar ti Baguio ken Benguet iti panagtudo ken napipigsa nga angin gapu iti Habagat ken Tropical Storm Pilandok.
Innayonna pay a posible a sumrek ti dua agingga tallo a bagyo iti bulan iti Septiembre.
Iti agdama, adda iti imomonitor ti ahensya a tropical cyclone a manamnama a mangipaay iti kanayonan a tudo a mapasaran ti Baguio ken Benguet. // Bombo Khey Reparip
