BAGUIO CITY–Nagun-od ti siudad ti Baguio ti maikasangapulo ket walo a pwesto manipud iti 33 a bilang dagiti nabigbig kas highly urbanized cities iti entero a Pilipinas.
Naawat daytoy a pammadayaw kalpasan nga insayangkat ti Department of Trade and Industry ti 2020 Cities and Municipalities Competitive Index.
Sigun kenni City Planning and Development Office head Architect Donna Tabangin, bukbuklen ti uppat a kriterya ti nasao a kompetisyon nga addaan iti 25% pakairamanan ti Economic dynamism; government efficiency; infrastructure; ken resiliency.
Manipud kadagiti nadakamatna a kriterya, nailista ti siudad ti iskor a 6.73 iti economic dynamism; 9.34 iti government efficiency; 5.81 iti infrastructure ken 16.66 iti resiliency.
Kinunana ni Tabangin a manarimaan ti panang-analisa ken panagadal ti lokal a gobyerno kadagiti datus tapno maamoan dagiti rumbeng a mapabaro a proyekto ken programa tapno mapangato pay ti pwesto ti siudad ita a tawen.
