Napagnunumuan ti lokal a gobierno iti Baguio City ken ti munisipyo ti Tuba, Benguet iti land swap deal a pakairamanan dagiti daga a kukua ti tunggal maysa ngem masarakan iti sakup ti sabali—maysa nga addang a mangpatingga iti nasurok a maysa a siglo a panagsusupiat iti beddeng.
Iti sidong iti katulagan, iyakar ti Baguio dagiti daga a nakaibangonan dagiti elementarya ken high school iti Tuba, kasta metten ti municipal building-da.
Kabayatanna, ipaay met iti Tuba iti Baguio dagiti lugar a pakasarakan ti Sto. Tomas High School ken sumagmamano a paset iti Baguio Water District.
Napagnumuan metlaeng ti dua a benneg a mangisayangkat iti pinal a survey ken raemen dagiti natural a beddeng ken dagiti daga nga addaan iti titulo, bayat a mataltalantan dagiti sumaruno nga addang tapno maipatungpal ti katulagan.
Sigun kenni Magalong, malaksid kadagiti surbey a mapatta-patta a dumanon iti dua a bulan, isimpa metlaeng ti dua a lokal a gobierno dagiti kasapulan a legislative process para iti katulagan.
Kasapulan a mangipasa iti resolusion ti konseho iti Tuba tapno isubmitir iti Sangguniang Panlalawigan iti Benguet para iti panangpapigsa, bayat agkiddaw metlaeng ti panagapbrobar ti Baguio iti City Council daytoy.
Innayon pay ni Magalong a kasapulan metlaeng a mangisayangkat iti plebisito tapno pormal a patibkeren ti katulagan, a saklawenna ti uppat a barangay iti Baguio ken maysa a barangay idiay Tuba.
Sigun kenkuana, makikoordinarda iti Commission on Elections tapno maplano ti plebisito, karaman ti schedule ken pondo daytoy.
Maipalagip a nangrugi ti isyu seknan iti nagbeddengan ti daga idi pay tawen 1927, gapu iti saan a nalawag a beddeng idi nagbalin a siudad ti Baguio idi tawen 1909.
Idi tawen 2005, naaddaan iti katulagan para iti 1:1 land swap, ngem daytoy ket vineto ni daydi President Benigno Aquino III idi tawen 2012 iti sidong iti napabaro a city charter.
