BAGUIO CITY – Nadismaya ti lokal a gobyerno ti siudad ti Baguio iti nagbalin a parikut iti basura kadagiti parke kagiddan ti panagturong ditoy lokalidad dagiti adu a tattao, pakairamanan dagiti turista iti napalabas a holiday season.
Impeksa ni Councilor Elmer Datuin ti nasao a banag iti panakiyuman ti Bombo Radyo kenkuana mainaig iti panakaibati ken panakaiwara dagiti adu unay a basura kadagiti kangrunaan a parke iti siudad iti napalabas a holiday season.
Sigun kenkuana, adu a personnel manipud kadagiti maseknan nga opisina iti lokal a gobyerno ti nagtrabaho iti holiday season tapnu laeng makolektar dagiti nagkaiwara a basura iti nagduduma a paset ti siudad, nangruna kadagiti parke.
Kinunana nga iti baet daytoy ket adu latta dagiti iresponsable a turista a mangigaggagara nga agbasura iti saan nga umno a disso.
Innayonna a kanayon met a panangipalagipda iti publiko ken kadagiti turista a no mabalin ket agtungpal dagitoy iti linteg ti siudad mainaig iti umno a panangibelleng ti basura.
Gapu iti daytoy, inaklonna a mapampanunotda ti panakaipataw ti environmental fee kadagiti amin a turista ken umili a sumrek kadagiti parke nangruna ta nailanad met daytoy iti City Environmental Code ngem saan met a maipatpatungpal.
