BAGUIO CITY- Napaay ti delegasyon ti Baguio City a manggun-od iti kampeonato iti kaleppas a 2018 Philippine National Games a naangay sadiay Cebu idi May 19-25.
Maibasar iti pinal a resulta ti ay-ayam, nagun-od ti Team Baguio ti maikadua a pwesto kalpasan a nakagun-odda iti 39 gold medals, 37 silver medals ken 58 bronze medals.
Nagun-od met ti Cebu City ti kampeonato kalpasan a nakailistada iti 46 gold medals, 64 silver medals ken 75 bronze medals bayat a nagun-od ti Mandaluyong City ti maikatlo a pwesto, ti Cebu Province iti maikapat a pwesto ken ti Mandaue City iti maikalima a pwesto.
Gapu iti napasamak, napagtalinaed ti Team Baguio ti medal standing daytoy iti 2016 Philippine National Games a maikadua a pwesto nupay nababbaba ita ti nagun-odda a bilang ti medalya.
Naamuan nga idi 2016 ket nakailista ti siudad iti 40 gold medals, 25 silver medals ken 21 bronze medals.
Nangipatulod ti siudad ti Baguio iti 210 nga atleta ken sports officials iti makalawas a torneyo a pinasetan ti nasurok 3,000 nga atleta iti entero a pagilian.
Naituding met a makaawat ti lokal a gobyerno ti Baguio iti P4-M nga sporting assistance.
Kabayatanna, nakagun-od met ti delegasyon ti probinsia ti Ifugao iti 3 gold medals, 3 silver medals ken 2 bronze medals ken adda daytoy iti maika-37 a pwesto manipud kadagiti nasurok 67 a lokal a gobyerno a nakipaset iti nasao a torneyo.
