BAGUIO CITY – Pinangabakan ni Baguio City Mayor Benjamin Magalong ti Nationwide People Manager of the Year Award for Public Sector 2021 a kategorya iti kaleppas a seleksion ti Philippine Management Association of the Philippines (PMAP) Awards.
Naawat ti ama ti siudad ti prestihiyoso a pammadayaw babaen iti naangay nga online webinar itay malem.
Maipalagip a naideklara ti opisyal kas Regional Winner iti Luzon para iti PMAP awards isu’t gapuna a nakwalipikar daytoy iti nasyonal a lebel.
Inabak ni Mayor Magalong dagiti pannakabagi ti Mindanao, Visayas ken National Capital Region para iti nasao a prestihiyoso nga award.
Ti PMAP Awards ket maysa a values-driven, principles-led, evidence-based, innovation-enabled, output-oriented program a mangipapaay ti pammadayaw kadagiti organisasyon, indibidual ken people programs a nakaragpat ti excellence ken distinction iti panagimaton kadagiti tattao.
Nabukel daytoy idi 1977 no sadino bukbuklen daytoy ti professional, non-stock, not-for-profit organization nga adaan iti nasurok 1,800 a member companies ken individual management executives a konektado iti human resource management ken industrial relations work.
Pinagyamanan met ti local chief exucutive ti naawatna a pammadayaw kagidddan ti panangbigbigna kadagiti nagduduma nga stakeholders ti lokal a gobierno ti Baguio tapno mamintinir ti panagbalin a modelo iti siudad kabayatan ti administrasiona ken nagruna ta mapaspasaran paylaeng ti epekto ti pandemya nga ituntunda ti COVID19 pandemic.
