BAGUIO CITY -Nabigbig ti Baguio City kas maysa kadagiti tallo a most improved local government units no maipapan iti environmental health services.
Sigun kenni Mayor Benjamin Magalong, inwaragawag ni Department of Health Cordillera Regional Director Ruby Constantino ti nasao a pammabigbig idi paylaeng Agosto 16.
Maibasar iti pakaamo ti DOH Cordillera, naipaay ti pammabigbig babaen iti Environmental Health and Safe Settings Division (EHSSD) para kadagiti lokal a gobierno a nangipaay iti dakkel a kontribusyon iti pannakapapintas ti environment health dagitoy babaen iti pannakaipasigurado ti kinatalged ti suplay dagiti mainum a danum, sanitation, food safety, governance ken health promotion para iti pannakaipaay ti nasalun at a panagbyag dagiti umili
Kinuna ni Magalong a maitunos daytoy iti pannakarambak ti World Environmental Health Day babaen iti Proclamation 595-2018.
Gapu iti dayta, makaawat ti syudad iti insentibo a dumanon iti P125,000 a maipaay iti Baguio City Health Services Office (CHSO) para iti environmental health programs dagitoy.
Kagiddan iti dayta, dinayaw ni Mayor Magalong ti CHSO nga idadauluan ni City Health Officer Dr. Rowena Galpo para kadagiti naar aramidan dagitoy para iti pannakaipasigurado ti salun at dagiti umili.
