BAGUIO CITY – Nabigbig manen ti Baguio City Police Office (BCPO) kas Outstanding City Police Office iti entero a Pilipinas para iti 23rd Philippine National Police (PNP) Community Relations Month.
Personal nga inawat ni BCPO Director PSSupt. Ramil Saculles ti nasao a pammadayaw sadiay Camp Crame manipud kenni PNP Chief Director General Oscar Albayalde.
Naamuan a naipaay pay iti BCPO ti Best City Police Office iti Regional Level ti 2018 PCR Month.
Nagun-odda ti nasao a pammadayaw gapu iti dakkel ken napateg a naaramidan ti BCPO iti benneg dagiti programada iti Police Community Relations a nakatulong iti pakabulan a peace and development initiatives ti PNP iti pagilian a nangiyasideg pay kadagiti pulis kadagiti umili.
Maipalagip nga idi May ti agdama a tawen ket nabigbig metlaeng ti BCPO kas top performing police station kalpasan a sumagmamano kadagiti personnel daytoy ti nag-excel iti nagduduma a tay-ak iti umuna a kwarter ti 2018.
Sigun kenni Saculles, nagun-odda ti nasao a pammigbig babaen iti awan sarday a suporta dagiti umili iti siudad.
Patien ti BCPO a napateg ti natibker a relasyon ken panagtalek iti nagbaetan dagiti pulis ken dagiti komunidad iti panakamintinir ti public safety ken epektibo a panagbantay.
Innayon ti BCPO a nakadependar dagiti pulis iti kooperasyon dagiti umili iti panakaipaay dagiti impormasyon seknan iti krimen iti lugarda ken iti panakibinnadang dagitoy iti panakabukel dagiti solosyon iti krimen ken riribuk.